زمن الرجولة جبر
واتنططوا الهايفين
إسمع معايا الخبر
شوفوا يا مستمعين
أشباه رجال حولنا
من كل صنف وطين
يتكلموا فلسفة
وأجمل ثياب لابسين
شعارات كتير في الهوا
من بين سياسة ودين
ويحسسوك انهم
قيمة ومحترمين
طول ما الحياة مضحكة
ينضموا للضاحكين
طول ما المكان زقططة
بيزقططوا الحلوين
قبلينا قالوا زمان
اياك تصاحب اتنين
مغرور خسيس عيان
واللي ماهوشي أمين
ساعة الصعاب الفصل
و الاختبار موازين
يكشف عديمي الأصل
والمنفوخين بلالين
يجي الخسيس يشتمك
فاكرك ضعيف ووهين
تحدف عليه جزمتك
ينكر كلامه يلين
ويقول انا ما أقصدك
انا قصدي ناس تانين
اكرمله كان واجهك
بعيون رجال واثقين
ولاكنش باس يدك
وبقى ذليل ومهين
أشرف عيال حتته
مالهوش شرف ولا دين
محمي وسبب نفخته
مصلحجي صنع الصين
والفرجة عاللي انكشف
من ناس تاريخهم زين
لكن كمان للأسف
اتفرجوا ساكتين
رجالة طلعم فسا
طلعم صحاب زايفين
غلبتكوا نون النسا
روحوا البسوا فساتين
مع إن في ستات
في الجد مش سهلين
غلبوا الرجال بثبات
زي الجبال واقفين
والبحث ساعة الحق
مين ينصفك ويعين ؟
فين الرجال ؟ في الشق !
بتدوروا على مين
** محمود بيومي **
