أيمن خليل
يا اسكندرية .. يا سمراوية
يا مخلياني مجنون بحبك
وقالوا عنك زمان مارية
لكن انتي أجمل كتير وربك
ماليش سواكي .. دبت ف هواكي
عايش معاكي .. ساكن في قلبك.
حسن عمران
اسكندرية يابحر هادي..
عروس وزينه حلوه لبلادي. .
هزمتي ياما كتير أعادي..
وكنتي ليكي الحق بادي.
أيمن خليل
ا اسكندرية فارد شراعي
وللحبايب فارد دراعي
الكل جالك .. وشاف جمالك
سايقة ف دلالك .. حبك جماعي
شطك دة مرمر .. واحلى منظر
من غير ما ادور .. جوك متاعي
حسن عمران
ياسكندرية الرمل صبح..
وستانلي رمله ع الورد فتح..
وجليم بموجه للرب سبح..
وقال شطوطنا دي أحلي مطرح.
ايمن خليل
يا اسكندرية والموج واخدني
لو مرة اعاكسه يجي معاندني
أفضل اصالحه .. وابوس في ملحه
ولما يرضى يروح سايبني
ماهو أصله غالى .. ومزاجه عالي
وفي الليالي يجي يصاحبني
حسن عمران
ياسكندرية ترماي يجنن.
. ووانلي فنه عمال يفنن..
والحلقه جايبه سمك مونون..
سمك وغالي والله يحنن.
ايمن خليل
يا اسكندرية يام الطيابة
يا جامعة ناسك من غير قرابة
كل اللي منك .. يحلف بإنك
من صغر سنك. . مغرم صبابة
وانا نفسي اغني. . رمشك شغلني
حسن عمران
ياسكندرية التاريخ حكاوي..
أقعد واسمع علي القهاوي.
. بونابرته قادم ولغزوه غاوي..
لكن الأهالي مقاومة.. تساوي.
ايمن خليل
يا اسكندرية كلك شهامة
حتى ف جمالك برضو بوسامة
اتمشى مرة .. واجري مرة
والحب جمرة .. تعبني ياما
ولو غبت حبة .. أزيد محبة
ولأحلى صحبة .. من غير ملامة
حسن عمران
شمسية يابني وافرد كراسي..
ده البحر سحره عازم ف ناسي..
شالله يامرسي يابو المراسي..
عاشقين جمالها م هو انت راسي..
جايين نصبح ياسكندرية..
ونحيي سيد والحلوة ديه..
وحاسبني يابني الحساب علي..
ولم حاجتك.. مسا التماسي.
ايمن خليل
ع الشط فارد حزني وهمومي
ولما أنزل أنشر هدومي
أعوم واحضن الموج بصدري
وأفضل هناك للصبح بدري
والشمس هالة و النسمة طالة
وتحت المظلة أقضي يومي.
حسن عمران
ياسكندرية بحرك غواني..
أغيب وأرجع ع الشط تاني..
أضرب لي بلطه.. ف الف حته..
وكورنيشي سكه.. تزرع أماني..
..........
ياسكندرية فنك ده باقي..
وبداره تسحر أرضي وسمائي..
تقول ياليلي.. وتقول ياعيني..
الفن يسري ف وجداني ساقي.
ايمن خليل
ياسكندرية هوا العصاري
واخد معايا صاحبي وجاري
ع الشط نفرش .. وكمان نفرفش
وكمان نقرمش سميط بكاري
والمغربية شمسك تروح
وإحنا ليها نشاور نلوح
تيجي النجوم .. وأوام نقوم
ننسى الهموم وكمان نسوح
حسن عمران
أسكندراني وواد لعيب..
والديبه ياما أجوان بيجيب..
ولا الأولمبي.. ناديا حبي..
وسيد البلد له في نصيب.
ايمن خليل
يا اسكندرية درويش ندالك
والتونسي شاهد فنون دلالك
مدد يا مرسي .. انا خدت كرسي
ع البحر قاعد .. شاهد جمالك
حسن عمران
أبو قير يمسي عليك ياعجمي.
. ويقول صباحو حلو وجميل..
ويقوله صبح صباح بأسمي.
علي شط هايل واسمه النخيل.
...........
الزنقه زنقه والحلو فيها طبع الحريم..
ستات وياما أخر طعامه بشكل سليم..
شاريه البراقع.............. ومافيش مانع
تاخد بنسها وتهدي ناسها سيجاد كليم.
ايمن خليل
ياسكندرية سيدي بشر قالي
كل الحبايب ناسي وأهلي
والشاطبي رحب بكل واحد
وابوقير يصبح بجماله شاهد
الرمل فارش سجاده ناقش
وترامه ينقل كل اللي قاعد
ليست هناك تعليقات:
إرسال تعليق